Waarom glo ek oom Angus Buchan is op die verkeerde pad?

Ek het die artikel geskryf na aanleiding van oom Angus Buchan se oproep op Maandag 27 Februarie 2017 om saam te kom op 22 April 2017 vir 'n massa gebedsbyeenkoms op 'n plaas net buite Bloemfontein. Oom Angus het Vrydag 24 Februarie 2017 beweer hy het God se stem gehoor; "IT'S TIME." Blykbaar het God vir hom gesê Suid Afrika is by 'n kruispad en as ons nie nou iets doen en saamkom om te bid nie, is dit verby met ons. Jy kan die video greep hier gaan kyk. Hierdie video greep (klik hier) het hy Maandag 27 Februarie 2017 vrygestel nadat hy die naweek gaan bid en sogenaamd by God 'n antwoord gekry het om 1 miljoen mense bymekaar te kry vir 'n massa gebedsbyeenkoms net buite Bloemfontein.

Die vraag is, "het God met oom Angus direk gepraat?" Hoe weet ons dit? Is oom Angus se bediening en teologie Bybels? Wat sit agter oom Angus se uitsprake? Op grond van wat kan oom Angus belowe God gaan mense in hul stoele genees? Met wat se gesag kan hy sê, "so se die Here," en dit dan koppel aan gehoorsaamheid aan God. My gevolgtrekking is dat oom Angus oor die jare onder die invloed van charismatiese en "word of faith" leraars gekom het soos Rodney Howard Brown, Rick Joyner, Kathryn Kuhlman, ens. Die is mense wie hy loof vir hul bydra tot sy eie sukses as evangelis. Oom Angus sê die volgende oor Kathryn Kuhlman, "Kathryn Kuhlman the great evangelist so powerfully used by God in signs and wonders and miracles prayed for the sick. I can honestly say that for me, preaching the Gospel is very similar. When we get on the platform in an hour's time, after the praise and worship team has led us into the presence of Almighty God after the shofars have been blown and cleared all the surrounding area of any spiritual darkness and the crowd are waiting to hear the Word of God the battle begins."

Mense kyk meeste van die tyd na iemand se lewenstyl. As hy 'n mooi voorbeeldige lewe leef; aangenaam, sag vriendelik en liefdevol is en daarby die naam van Jesus gebruik, glo hulle daar skort niks met sy teologie nie. Dis net hier waar ons een van die grootste fundamentele foute maak en ons oopstel vir Satan se dwaling. Hy doen hom graag voor as 'n engel van die lig wat mooi praat en optree (2 Cor. 11:14). Dit alleen is nie 'n teken dat iemand in die waarheid is nie. Die waarheid is gesetel in LEER en LEWE. Waarop baseer jy jou Christenskap? Wat bepaal wat jy doen en sê? Dis hier waar die spreekwoordelike "paw-paw" die "fan strike." Jy sien, gesonde leer van die Woord is net so belangrik soos Jesus homself. Jesus is die weg, die WAARHEID (gesonde leer) en die lewe (John 14:6). Jesus is nie net die lewe nie. Jesus is ook die waarheid. Jy kan nie bely om in Jesus te wees en dan spreek jou lewe nie van die waarheid van die Woord nie. Reddende geloof is gebaseer op die kennis van die Persoon en werk van Christus. So, wat leer en doen oom Angus? Dit is 'n baie belangrike vraag? Dit is hier waar ek glo dinge begin skeefloop in oom Angus se lewe en bediening.

Die teologie agter oom Angus se manier van dinge doen is die probleem en nie net die dinge wat hy doen nie. Oom Angus se bediening was nog altyd geskoei op uiterlike tekens en vertoon-godsdiens: tekens in die wolke, op die horison, atmosfeer, genesings, gevoelens en uiterlike ervarings in verskeie vorme. Hy praat gedurig daaroor. Sonder groot byeenkomste, magsvertoon, emosies, tekens en wonders is oom Angus niks. Hy baseer nog altyd sy bediening op getalle en magsvertoon. Daar is vir hom slegs sukses in die massas. Hy het 'n sigbare godsdiens geskep wat afhanklik is van sien en nie geloof nie. Die vraag is sal ons bly glo in Christus as die huidige situasie aanhou en ons geen wonderwerke sien vir nog klomp jare nie? Die Nuwe Testamentiese kerk het onder die Romeinse regering vir paar eeue bitter swaar gekry en is vermoor omdat hulle in Christus glo. Dit het met hulle baie slegter gegaan as met ons. Hulle het getrou bly glo in Christus en nie wonderwerke en massabyeenkomste nagejaag nie. Hulle het elke dag die evangelie verkondig en Christus geloof en gedank in alle omstandighede (1 Thess. 5:18). Wie is ons om aan God voor te skryf deur 'n massasaamtrek dat Hy iets moet doen? Hy sal dit doen ooreenkomstig Sy raadsplan. Calvyn verduidelik dit soos volg: "Ten slotte moet ons in elke gebed sorgvuldig daarop let dat ons God nie aan bepaalde omstandighede wil bind nie en ook dat ons nie aan Hom die tyd, die plek of die manier moet voorskryf waarop Hy iets moet doen nie" (Inst. 59, 3.20.50).

In oom Angus se video Maandag, 27 Februarie, het hy gesê mense gaan op 22 April in hul stoele genees word. Wie gee hom die reg om so iets te sê? Wie gee hom die reg om namens God te praat? Hoe kan hy so verwagting skep? Wat gaan Hy vir die mense sê wat nooit genees word nie? Het God hulle nie gehoor toe hulle reeds gebid het nie? Miskien is dit God se wil om nie mense te genees nie? Hy antwoord hulle nooit, want hy moet die positiewe "pep-talk" handhaaf om die verwagting by mense te op te hou. Kan hy op God se hand praat? Hy is op baie gevaarlike terrein. Is hy God wat kan besluit wat gaan gebeur? God doen soos Hy wil ooreenkomstig Sy raadsplan en geen massa byeenkoms gaan Sy arm draai nie.

Hy het ook gesê 22 April is die laaste kans vir Suid Afrika anders is dit verby. Wie gee hom die gesag? Verstaan hy enigsins wie is God en hoe Hy werk as Hy so iets sê? God is soewerein en werk te midde van alles. Goed en slag is deur Hom voorbeskik in Sy soewereine raadsplan om Sy goeie wil uit te werk (Is. 46:3-11). Wie is ons om aan God voor te skryf dat die huidige situasie in Suid Afrika nie binne Sy raadsplan is nie? Wie is oom Angus om te sê dis die laaste kans? Dit spreek van baie onkunde en arrogansie om namens God sulke uitsprake te maak. God het geen raadgewer nodig en het alles voorbeskik om te gebeur in Sy soewereine raadsplan. Dis gelowiges se plig om aan God te onderwerp, Hom getrou te dien in alle omstandighede en Hom te dank vir alles.

Hy het ook gesê die mense moet in hul massas opdaag - 1 miljoen - sodat God sy mense kan besoek. Hy beweer as ons in groot getalle bymekaarkom sal God ons hoor en die land genees. Hy beweer ook God het gesê ons moet bymekaar kom en nie net in ons kerke of huise bid nie. Dis blykbaar nie goed genoeg nie, want dit is nie wat God gesê het nie. Hoe kan oom Angus God so bind? Wie gee hom die reg om God se teenwoordigheid te fasiliteer? Het God oom Angus aangestel soos 'n Moses van ouds om Sy "volk" bymekaar te roep? Hoe kan oom Angus belowe God gaan daai dag teenwoordig wees en mense genees? Het oom Angus in God se raadskamer gesit sodat hy die raadgewer van God kan wees? Wel, dis wat oom Angus beweer met hom gebeur het oor die naweek van 24 Februarie. God kan mos mense in hul huise, kerke, stiltetyd of sommer net daar waar hulle is ontmoet. Weereens is dit die vertoon-godsdiens waarvan oom Angus afhanklik is.

Oom Angus tree meer en meer op asof hy 'n Moses van ouds is en asof Hy Christendom in Suid Afrika se leier is. Sy spreke en optrede is tipiese Moses-taal. Van die MMC's in die verlede is soos 'n tabernakel van ouds ingerig met die massiewe verhoog in die middel. Dit lyk kompleet soos Israel wat rondom die tabernakel saamtrek en aanbid. Daar is ook baie "Hebrew Roots" elemente teenwoordig by die byeenkomste. Ek was ook daar. Dis ramshorings, "prayer-shawl's," olyfolie, en verskeie joodse gebruike. Mense verbeel hulle kompleet hulle is byeen soos Israel van ouds. Mense het soontoe gegaan asof hulle na die tabernakel toe gaan om deur Moses gelei te word. Oom Angus het self by paar geleenthede gesê die byeenkomste is soos die tabernakel van God waar mense Hom gaan ontmoet.

Laas jaar het hy die "Sacred Assembly" gereël. Hy het Ou Testament skrifte gebruik wat sinspeel op die Israeliete se "heilige byeenkomste" met Moses toe God deur hom met die volk gepraat het. Hy het toe ook gesê die mense moet in hul duisende opkom na die "heilige byeenkoms" waar God sy mense gaan ontmoet. Toe het hy weer beweer die byeenkoms is die grootse en belangrikste nog ooit. Hy maak elke keer die opmerkings. Daar is al 'n patroon hoe hy praat oor die byeenkomste. Dit is altyd die laaste kans en die belangrikste byeenkoms anders gaan daar 'n "einde" of "katastrofe" wees. Dis tipies moderne charismatiese motivering en opsweping. Subtiel skep dit die afwagting en verwagting by mense dat dit hul laaste hoop en kans is. Waar kry oom Angus die gesag om die uitsprake te maak namens God? Hy is op 'n baie gevaarlike terrein.

Oom Angus is meer en meer besig om homself in 'n ongesonde afgod in te skilder. Hy waarsku ook nie mense daarteen nie. Paulus en Petrus sou nooit die heldeverering toegelaat het nie. Hulle het dadelik daarteen gepraat. Jesus, wat self God was, het nie soos 'n "superhero" mense by hul massas gemobiliseer nie. Inteendeel, toe mense hom koning wil maak het hy hulle aangespreek juis omdat hulle emosioneel mislei was en na 'n aardse koninkryk gesoek het (John 6:14-15). Baie mense wat na die byeenkomste gaan, soek na 'n aardse koninkryk en heerser. Dit sterk oom Angus in sy kwaad. Oom Angus maak beloftes en uitsprake asof hy deur God aangestel is as 'n "profeet." Dis asof hy direk by God hoor wat God se planne is en dan spreek hy dit uit met die gesag van God. Asof hy weet wat God gaan doen. Die Woord waarsku ons baie ernstig om in die naam van God beloftes te maak (Lev. 19:17-18). Dit skep 'n vals verwagting by mense. Oom Angus het soos 'n kultus figuur geword in Suid Afrika. As mens vrae stel aangaande sy bediening, verskeur mense jou. Dit lyk of oom Angus bo die Woord verhewe is. Hy mag goeie motiewe hê, maar hy wil na geen raad luister nie. Hy het te veel mag. Dis baie ongesond.

Meer en meer is oom Angus besig om in die rigting van 'n Reinhardt Bonke, Rick Joyner of Todd Bentley te beweeg. Hy het die laaste paar jaar baie charismatiese wêreld leiers ontmoet soos Rick Joyner. Met die opening van sy MMC in Amerika so paar jaar terug het hy saam met Rodney Howard-Browne en Danie Slabbert verskyn en hulle geloof as manne van God wat die waarheid van die Woord verkondig. Beide die manne beweer hulle is apostels en profete wat deur Jesus aangestel is. Oom Angus homself het al baie keer beweer hy kry profesieë van Jesus af soos met die gebedsbyeekoms waar hy beweer God het vir Hom gesê "IT'S TIME." Dis tyd dat mense hul oë oopmaak en ophou verblind wees deur die magsvertoon en vriendelikheid. Dis juis in die donker tye wat Satan mense met uiterlike vertoon-godsdiens mislei agter 'n sigbare tekens-godsdiens aan waarvan baie sommer net namaaksels is. Mense is "gullible." Hulle glo alles en eet alles op vir soetkoek. Dis baie ongesond om die man so op te hemel. Dis asof mense van totale nugterheid ontneem is. Niemand wil luister nie. Ek sê nie oom Angus is nie 'n Christen nie. Hy mag een wees, ek is nie God om in sy hart te sien nie. Maar hy is mislei en mislei baie mense agter hom aan soos die "Pied Piper."

Hier is 'n voorbeeld van die rigting waarin oom Angus besig is om te beweeg (klik hier). Die byeenkoms was in 2013 in Ein Gedi waar oom Angus 'n spreker was. Oom Angus het soos 'n moderne herlewingsprediker die Heilige Gees geroep om af te kom soos in Handelinge 2. Jy kan nie die Heilige Gees wat reeds uitgestort is op die kerk op Pinkster afroep om weer uitgestort te word nie. In die video word 'n sogenaamde Pinkster gebeurtenis gefabriseer deur 'n storm wat deur die weerburo voorspel was. Die hele tyd roep oom Angus die Heilige Gees asof God 'n mag in ons hande is. Ek moet sê dit het my baie aan die Baal-profete in 1 Konings 18-20 laat dink. Dit is wat mens "charismatic-chaos" noem. Die Heilige Gees is 'n Persoon wat deel is van die drie-enige God. Die gebeurtenis is lynreg teen die Bybel. Daar is ook bewyse in die video analise hoe oom Angus gejok het oor die weer en reën tydens die byeenkoms. Hoe hy op Radio verder gaan jok het daaroor. Gaan kyk gerus na die evaluasie van werklike beeldmateriaal van die gebeurtenis (klik hier).

Christendom in Suid Afrika moet terugkeer na die Woord van God en ophou om hul hoop te soek in 'n uiterlike vertoon-godsdiens. God het ons alles in Sy woord gegee wat ons nodig het om die huidige situasie in ons land te hanteer. Mense wat bely dat hulle Christene is moet hulself vestig in Christus-gesentreerde gemeentes en die Here daar begin aanbid en dien. Gemeentes moet die evangelie leef en verkondig aan hul onmiddellike omgewing. Die oplossing lê nie in oom Angus en sy massa byeenkomste nie. Die antwoord lê in gesonde plaaslike gemeentes wat Bybel-gefundeer en Christus-gefokus is. Dit lê nie in oom Angus wat soos 'n "profeet" 'n kerklose massa emosionele opsweep nie. God praat nie direk met oom Angus nie, Hy praat deur Sy woord met Sy kerk.

Wat is Christus se plan vir Suid Afrika?

Volgens die Bybel is Christus se plan Bybel-gefundeerde, Christus-gesentreerde en God-gefokusde gemeentes wat gebou is op die fondasie van die apostels en profete (God se heilige Skrif) met Christus as Hoof. Die gemeentes bestaan uit ouderlinge, diakens en lidmate wat saam groei om 'n heilige priesterdom (liggaam van Christus) te wees tot eer van God. Christus het herders, leraars, ouderlinge en diakens onder Hom aangestel om Sy skape te versorg, te leer, te lei, te beskerm, te vermaan en te voed. Christus se plan is om gesonde gemeentes en gesonde gesinne te vestig in Suid Afrika wat Christus-gefokus en evangelie-gesentreerd sal leef in die omgewing waar hulle geplant is. God wil Suid Afrika transformeer deur Christus-gesentreerde gemeentes wat in Sy Woord gefundeer is. Dit is die kerk wat Christus deur Sy apostels geplant het. Nie 'n gesiglose en kerklose massa wat herderloos rondhardloop agter elke wind van lering aan nie. Hierin glo ek lê die antwoord vir Suid Afrika, want dis die nuwe testamentiese kerk wat Christus geskep het.