Waaroor gaan die evangelie?

WAT IS DIE WARE EVANGELIE? ....Die evangelie is slegs 'n Persoon. Die evangelie vind sy inhoud in die geboorte, lewe, leer, dood, opstanding en verheerliking van Jesus Christus die Here. Jesus is God in menslike vorm. Jesus is die eenheid van twee nature, God en mens, in een Persoon. Jesus Christus is die Here. Jesus Christus is die Seun van God. Jesus Christus is Emmanuel, God met ons. Jesus Christus is die wysheid, geregtigheid, heiligheid en verlossing van God (1 Cor. 1:30). Jesus Christus is die evangelie.

Die kruis het twee arms. Vertikaal na die Vader en horisontaal na die wêreld. Jesus het Sy arms en bene regoor beide gespan en dit verenig in 'n eenheid deur vasgespyker te word regoor beide. Verwyder jy die vertikale arm, skeur jy Jesus in twee, is die kruis verbreek en word die Vader nie verheerlik nie. Verwyder jy die horisontale arm, is jou geloof dood en kan nie red nie. En weereens skeur jy Jesus in twee en verdeel die kruis. In beide gevalle word die kruis waardeloos gemaak. Jesus het gesê jy moet die Here jou God liefhê met jou hele hart, wil, verstand en siel en jy moet jou naaste liefhê soos jouself. Hierin is die hele wet en profete saamgebind (nie die een sonder die ander nie).

Die vraag is nou: floreer ons slegs in een area? Indien wel, word die kruis verbreek en waardeloos gemaak. Dit getuig van 'n valse evangelie.

Wat is die vertikale arm. Dis die 5 Solas. Dis die gesonde leer en belydenis van die kerk. Dis om God te verheerlik deur Sola Scriptura, Sola Gratia, Sola Fide en Solus Christus sodat Soli Deo Gloria plaasvind. Buite dit word God nie verheerlik nie en word die kruis verbreek.

Wat is die horisontale arm? Dis liefde vir alle mense wat vloei uit die kruis van Jesus. Dis liefde vir alle mense wat Skrif gebaseer is. Dis liefde vir alle mense deur hul na die waarheid en evangelie te lei. Dis liefde vir alle mense wat oorgaan in dade. Dis ware geloof wat gewys word deur dade. Geloof wat nie vrug dra van dade nie is dood en kan nie red nie. Dis liefde vir alle mense deur eerste hulle te vertel van die kruis en opstanding van Jesus sodat hulle van hul sonde waarin hulle vasgevang is gered kan word. Wat help dit jy gee kos en sorg, maar die siel brand in die hel. Vrees die een eerste wat die liggaam en die siel in die hel kan gooi. Dan tel jy die gewondes langs die pad op soos die barmhartige samaritaan gedoen het. Liefde vir God dryf liefde vir mense, nie anders om nie. Ons word eerstens gedryf deur die liefde van Christus vir hul verlore siele wat gedemonstreer was aan die kruis en dan gee ons hul kos en sorg emosioneel vir hulle.

Wat help dit ons presteer op horisontale vlak maar die gesonde leer word versaak. Dit getuig van 'n gebroke kruis en 'n evangelie wat nie kan red nie. Dit getuig van 'n liefde vir God wat nie Gees gebore en gedryf is nie. Die ware liefde wat die Gees werk is lief vir die waarheid bo alles en dan sekondêr vir mense. God is eerste lief vir Sy Seun en dan vir mense. Die kruis is 'n eenheid. Verbreek jy die kruis is daar geen evangelie nie.

Winde van Verandering

Elke wind van Lering. (Efesiërs 4:13)

Winde van verandering....Ek was vanoggend so ontnugter en swaarmoedig oor die verskillende winde van leringe wat rond waai en hoe verskillende mense daardeur meegesleur word. Mense se gedagtes word opgeneem en vasgevang deur die fassinasie wat die nuwe winde bring. Baie van dit is nie nuwe winde nie, maar was altyd daar. Hoe se die Bybel: "daar is niks nuut onder die son nie." Paulus skryf soos volg daaroor: "totdat ons almal kom tot die eenheid van die geloof en van die kennis van die Seun van God, tot ‘n volwasse man, tot die mate van die volle grootte van Christus; sodat ons nie meer kinders sou wees nie wat soos golwe geslinger en heen en weer gedryf word deur elke wind van lering, deur die bedrieëry van die mense, deur sluheid om listiglik tot dwaling te bring." (Eph. 4:13-14).

Dis duidelik uit wat Paulus vertel dat mense weens 'n gebrek aan insig en kennis van wie Jesus Christus is meegesleur word deur die winde van verskillende leringe. Die volheid is in Christus alleen en deur Hom te ken kom ons tot volwassenheid as christen. Ons volwassenheid word gemeet aan die mate en grootte van ons intieme kennis en insig van wie Christus is en wat die evangelie behels. 'n Tekort hieraan maak ons kinders en veroorsaak dat ons rond geslinger word soos 'n boot op die see deur verskillende rukwinde van elke lering wat ons fasineer. Ons verander gedurig van rigting na gelang van die wind. Daar is 'n Afrikaanse gesegde wat soos volg gaan: "soos die wind waai, so staan my jas se punt." Dit beteken basies dat ek beweeg in die rigting van die wind. Kinders word maklik 'n gat in die kop gepraat. Grootmense het wys geraak en het deur insig en ervaring geleer wat om nie vir soetkoek op te eet nie. Paulus se as christen werk dit net so. 'n Gebrek aan geestelike openbaring en insig, wat deur die Heilige Gees alleen kom, wat gevind word in die Woord, veroorsaak dat leermeesters met slim en logiese redenasies mense maklik kan meesleur in 'n rigting wat nie is wat God bedoel het in Sy Woord nie. Paulus verduidelik ook dat die mense baie slim en slu is. Hul redenasies en teorieë is baie goed en neem mense wat nog kinders is in geloof en insig in die Woord maklik gevange. Baie van die leringe is baie indrukwekkend en kom baie wys voor. Die mense se "presentation skills" is baie goed. Hulle denke is prysenswaardig en dit is vreeslik aantreklik. Mense word maklik daardeur beïndruk en sodoende meegevoer.

Die antwoord hierteen is Christus sê Paulus. Hy is die wysheid van God (1 Cor. 1:22-31). 'n Openbaring en insig wie Christus is, is die volheid en wysheid van God. Mense hardloop gewoonlik agter elke nuwe gier aan weens 'n leemte in hul eie siel. Hul honger en dors na meer of iets nuut omdat hul eie siel 'n dorsland is. Die nuwe gedagtes fasineer hulle en bring tydelike verligting. Jesus het gesê Hy is die water en brood van die lewe. Wie van Hom eet en drink sal nooit weer honger word of iets ekstra nodig hê nie. Mense soek gedurig na meer omdat hul nog nie Christus en Sy volheid gevind het nie. Sodra nuwe idees kom, vang dit hulle en voel hulle so gefassineer daardeur dat dit tydelike verligting bring vir die dorheid in hul eie siel. Jesus Christus alleen is die wysheid van God. Geen wind van lering kan dit bring nie. Die ware lering is Christus gesentreerd en nie allerhande idees nie. Toets elke lering hieraan. Verkondig dit Christus ALLEEN as die antwoord en wysheid van God as die water en brood van die lewe? Daar was nie een mens in die Bybel wat Jesus ontmoet het wat weg gestap het en nog iets nuut nodig gehad het nie. Jesus het alles geword en ons deel in daai "alles" deur eenheid met Hom wat slegs die Heilige Gees kan bring. "Maar deur Hom is julle in Christus Jesus, wat vir ons geword het wysheid uit God en geregtigheid en heiligmaking en verlossing" (1 Cor. 1:30). "Want in Hom woon al die volheid van die Godheid liggaamlik; en julle het die volheid in Hom wat die Hoof is van alle owerheid en mag" (Col. 2:9-10).