TWEE FOTO'S; TWEE STORIES; DIESELFDE REDE

Fotot 1, Links: Xenofobie aanval die afgelope weke in Suid Afrika.

Foto 2, Regs: Skending van Rhodes Standbeeld.

Vir my het die twee stories dieselfde oorsprong. Dit gaan nie oor Rhodes nie. Dit gaan nie oor werk en geld nie. Dit gaan nie oor mense wat ons goed onregverdig vat nie. Dit gaan oor 'n demonies geïnspireerde moorddadigheid. Dit gaan oor 'n gees van revolusie en afbreking.

Die mens dien die vader van alle moord en leuens. Alle mense is hiertoe in staat wat onder die mag van Satan is. Alle mense word gebore onder die mag van die Satan en die sonde in hulle. Slegs die evangelie maak mense vry.

Wat is die antwoord?

Bid tot die Here van die oes om genadig te wees eerste teenoor ons. Sodat ons die goed kan verdra. Tweedens, dat ons, ons vyande sal liéfhê. Dat ons te midde van die chaos hoop sal kry en behou in Sy ewige plan en beheer oor alle sake.

Die goed maak my as mens moedeloos. Ek ervaar 'n tweestryd in my liggaam. Ek wil opgee en ek wil kwaad raak. Maar ek weet ek kan nie, want ek ken die Koning van die heelal. Ek moet weer op my aangesig val en bid vir krag en genade. Ek moet hierdie pad stap. Hy is moeilik, hard en seer. Ek moet aanhou, want ek ken die einde. Ek mag nie deelneem aan haatspraak en hopeloosheid nie, want ek weet God verwag iets anders van my as Sy ligdraer. Daarom moet ons op ons knieë gaan en smeek. Ons moet die Woord opneem en opeet en verslind. Ons moet getrou elke dag die evangelie bring aan die mense om ons.

Daar is net een wapen teen die bose en dis die Woord van God en gebed.Eenvoudige kinderlike gebed wat uitroep in desperaatheid. Geen vorm gebede wat gepaard gaan met "prayer walks." Geen duiweluitdrywing en bind van allerhande dinge nie. Geen massabyeenkomste nie. Geen olie wat orals op straathoeke geverf word nie. Dit is niks anders as afgodery onder die naam van Christus nie. Jesus bestraf die bose nie mense nie. Ons praat met Hom daaroor.

Eenvoudige kinderlike gebed wat in nederigheid die God van die heelal, se aangesig opsoek en Hy sal hoor en Hy sal Sy wil laat geskied. Die Woord belowe dit. Die antwoord gaan ook nie wees dat dinge noodwendig nou gaan verander nie. Die antwoord gaan wees dat ons eers krag kry om op te hou vrees. Dat ons ophou deelneem aan agressie en haatspraak. Dat ons, ons vyande lief genoeg sal hê om vir hulle te bid en die evangelie aan hulle te bring. Dat ons deel sal wees van die kalmte en nie die agressie nie. Dat ons die sout en lig vir SA sal wees.

Die Voortrekkermonument en Vrymesselaars

Ek wil kortliks my mening lig oor die Voortrekkermonument en Vrymesselaars debat.

Ek stem nie saam met die koppeling van Vrymesselaar-simboliek aan die Voortrekkermonument nie. Dit beteken nie daar is godsdienste wat se simbole en beelde werklik betekenis het nie. Byvoorbeeld Hindoeïsme: hul beelde het baie simboliek, maar dit word openlik gekoppel aan hul godsdiens. Dit kan opgelees en met feite geverifieer word. Die hele Vrymesselaar debat met simboliek in kerke en monumente is in 'n groot misterie gehul. Dit kan nie direk met feite en gebeure bewys word nie. Dit beteken ook nie daar is nie individue wat wel hierby betrokke is en selfs in die kerk is nie. Ons weet mos nou dat ongelowiges wat die werke van Satan bevorder, teenwoordig is in die kerk soos die gelykenis van die koring en onkruid aan ons verduidelik (Matt. 13:36-43).

Die probleem met baie van die teorieë is dat dit baie spekulatief is en mens sukkel om dit met feite te bewys. Feite is iets wat met datum, tyd, plek, mense en wat gesê en gedoen is verbind kan word. Die misterie en geheimenis daaragter maak dit nog meer aanloklik. Hoe bewys mens dit regtig sonder klinkklare uitlatings en planne. Al hoe jy dit werklik kan bewys is deur mense se lewens en geloof direk te koppel aan die monument. Mens moet onthou die kerk in Suid Afrika het 'n ryk geskiedenis in die gereformeerde leer. Het die kerkvaders in ons verlede geweet van die geheime planne en dit goedgekeur. Beteken dit alles wat die gereformeerde tradisie in Suid Afrika gedoen het was goddeloos? Ons moet nie vergeet dat geloof en kerk baie nou gekoppel was aan die bou van die Voortrekkermonument. Dit was 'n direkte gevolg van die wonderwerk met die slag van Bloedrivier. Is ons werklik nou bereid om te sê ons gelowige voorouers wat by Bloedrivier betrokke was het doelbewus 'n afgodstempel gebou wetende wat God gedoen het? Ek betwyfel dit. Dit beteken ook nie ons voorouers het nie foute gemaak en op plekke Bloedrivier verkeerd gaan interpreteer rondom apartheid nie. Daar is mos baie voorbeelde in die Bybel hoe Israel God se dade verkeerd gaan interpreteer het vir hul eie idees.

Mens kan basies enigiets inlees in 'n simbool of beeld en 'n baie geloofwaardige teorie daaragter skep. Sameswering en misterie agter 'n goeie teorie gee dit juis "geloofwaardigheid", want mens kan dit nie reg of verkeerd bewys nie. Dit sal verewig aanhou en die misterie daaragter is so bemarkbaar. Die menslike aard is maar net so vatbaar vir sameswering en misterie dat dit soos soetkoek opgeëet sal word. Ek persoonlik dink van al die sensasie en sameswering wat ons lees is maar 'n baie klein persentasie waar. Ek dink dis juis die hoeveelheid misterie en sameswering wat die bietjie wat wel waar is verbloem. Ek dink dis 'n baie slim set van Satan om sy werklike leuens weg te steek deur van die verwarringstegniek gebruik te maak. Hy skop stof op om ons besig te hou op verkeerde plekke. Hy laat ons energie mors op misterie sodat ons aandag weg is van die werklike probleme. Baie mense het nie meer vertroue in apologetiese skrywes weens die slim set. Sodoende dink baie mens elke teorie is maar net nog 'n storie. Die uitwys van werklike dwaling en leuens verloor so geloofwaardigheid. Satan is mos die vader van alle leuens en weet hoe om alles tot sy voordeel te gebruik.

Laat ons egter nie die grootste sameswering van alle tye vergeet nie. Dit speel af reg voor ons oë elke dag. Dit het begin met die val van Satan en die misleiding en versoeking van mense om sy agenda uitgevoer te kry. Sy doel is om die Seun van God aan die hakskeen te byt en so by God uit te kom. Daar is vyandskap tussen sy nageslag en die nageslag van God (Gen. 3:15). Die storie is 'n werklike storie en ons sien dit elke dag in verskillende vorme afspeel. Satan verlei sy geslag en gebruik hulle om God se geslag by te kom. In die wêreld is daar geestelike saad van satan en geestelike saad van God. Dis die uitverkorenes van God teenoor die nasate van Satan. Sy navolgers het gekom deur die sondeval. Op so manier het hy 'n hand in die mensdom gekry. Laat ons nie vergeet die Slang van ouds se kop is vermorsel en Sy werke is aan bande gelê (Rev. 20:2). Hy is nie vry om te maak soos Hy wil nie. God is in beheer van elke bewegende molekule. Sy kop is vermorsel en sy einde is opgeskryf. Die meeste van die tyd lyk dit vir my of Christene lewe asof God nie bestaan nie. Hulle praat asof God nie in beheer is nie. Laat ons nooit vergeet dit is God wat alles reeds voorbeskik het en alles sal uitwerk soos Hy dit beplan het (Is. 47 3-11). "Daar is niemand soos Ek nie; wat van die begin af verkondig die einde, en van die voortyd af wat nog nie gebeur het nie; wat sê: My raad sal bestaan, en al wat my behaag, sal Ek doen. Soos Ek dit gespreek het, sal Ek dit ook laat kom; Ek het dit voorberei, Ek sal dit ook doen."

Alhoewel die hele Vrymesselaars teorieë van die Voortrekkermonument baie geloofwaardig lyk en klink, kan dit nie klinkklaar bewys word nie. Ek weet nie of die bedoeling met die Voortrekkermonument doelbewus Vrymesselary was nie. Ek het al die teorieë gelees en kon nog nooit werklike bewyse gekry dat dit gebou was met die doel om afgode te aanbid nie.

Dit gesê ontken ek nie die bestaan van Vrymesselaars nie. Ek dink net mens moet versigtig wees om met sameswering op hol te gaan sonder werklike feite. Werklike feite is nie goed wat net so lyk en ooreenstem met Vrymesselaar simbole nie. Ware feite is goed wat mense werklik gedoen het met 'n spesifieke doel en agenda. Dit is goed wat aan mense gekoppel word wat deur hul leer, lewe, geloof en vrug bevestig word. Die mense wat betrokke was met die bou van die Voortrekkermonument was Christene wat in die destydse gereformeerde tradisie was. Die kerkvaders van destyds sou mos geweet het en sou iets gesê het. Tensy ons beweer ons voorouers was goddelose Satanaanbidders.

Behalwe dit, dink ek daar is 'n groter saak te maak vir afgodery bloot op die houding van mense se hart. Enige iets is 'n afgod wat die eer van God inneem in my lewe bo Hom. Jesus het gesê ons moet nie belange hier op aarde hê wat belangriker as die koninkryk van God is nie, want waar ons hart is, daar sal ons toewyding wees (Matt. 6:19-24). Ons kan nie twee meesters dien nie (Matt. 6:24. Jy sal altyd die een afskeep en Jesus staan nie in kompetisie met enige iets of persoon nie. Dit beteken mense kan 'n afgod maak van hul kultuur, erfenis en monumente. Wanneer ons kultuur, erfenis en monumente die koninkryk van God en die evangelie oorspan, is dit verkeerd. Op die manier aanbid mense hul erfenis bo God. Dit beteken nie ons kultuur en erfenis is noodwendig verkeerd en moet verwerp word nie. Enige kultuur is welkom in die koninkryk van God, mits dit nie teen Sy Woord is nie. Dit is vir my beter om hierop te konsentreer, want dit gaan oor die hart vir God. Hy soek 'n hart wat onverdeeld op Hom gerig is. Op die einde van die dag gaan enige sonde oor die aanbidding van iets behalwe God.

'n Boodskap aan my mense

Ek gaan iets sê wat dalk verkeerd verstaan kan word en ook gemoedere hoog kan laat loop. Ek dink tog dis nodig om dit te sê omdat ek glo dis wat die Bybel leer.

My opinie is dat die revolusie gees onder baie blanke Afrikaners niks anders is as die gees in Mallema nie. Ek stel nie belang in 'n volksrevolusie nie. Ek stel belang in God se koninkryk wat bestaan uit alle volke, nasies en tale vir wie ek lief kan wees en broederliefde wys. Vir wie Christus gesterf het en wie my eenheid in Christus deel. Ek wil ook bysê dat my oë nie toe is vir die onreg van die huidige regering nie. Ek veroordeel dit en dit is teen die wet van God.

Wat baie blanke Afrikaners mis wat hulself Christene noem is dat God in beheer is en baie keer Israel in ballingskap weggevoer het omdat hulle nie wou bekeer na God alleen nie. Verder is Josef by meer as een geleentheid onskuldig in "ballingskap/tronk" geplaas om 'n groter doel in God se wil te bereik. Dit was om "Israel/Kerk" te red. Het ons al ooit daaraan gedink dat die dinge, onskuldig of nie, deel van God se plan is om Sy mense onder alle volke te red. Paulus skryf hy verdra alles terwille van die uitverkorenes wat nog gered moet word. Is dit ons gesindheid of is ons eie agendas groter as God sin. Ek dink ons moet mooi gaan kyk na wat God leer oor kerk, koninkryk en Sy groter plan. Dan sal ons dalk ophou murmureer en deel raak van God se plan om Sy volk te bou en nie ons eie nie. Sy volk is geestelike Israel, die kerk, uit alle volke, nasies en tale. Nie net die Afrikaner nie.

Nadat ek dit alles gesê het, wil ek net noem as ek verstaan word dat die Afrikaner sy kultuur moet vergeet en weggooi en identiteitloos raak, verstaan jy my verkeerd. God se kerk en Sy koninkryk is 'n multikulturele kerk. Dis nie net ons kultuur wat daarin bestaan nie. Alle kulture is welkom en in elke kultuur is daar goed wat nie verkeerd is nie en uniek is tot die spesifieke gemeenskap. God is lief vir alle tipe mense met hul kultuur en Hy nooi hul uit tot geloof in Sy Seun met hul uniekheid en kultuur. Dit wat nie welkom is nie, is dit wat teen God se wet is en Sy plan (evangelie) ondermyn. Dit is ons plig as Christene om biddende God se Woord te ondersoek en deur die Gees te verstaan wat in my kultuur is teen God se plan en wet. Dan moet ons dit verwerp.

Die beelde wat ons bind

Ek luister vanoggend op RSG 'n debat oor die standbeeld kwessies. In die lig van die Bybel dink ek toe die volgende.

Paulus word vir die nie-Jode soos heidene en vir die Jood word hy 'n Jood met die uitsluitlike doel dat die evangelie nie op enige manier verhinder mag word nie sodat sommige gered kan word onder die nie-Jode en Jode. Hy gee sy eie kultuur heeltemal op. In moderne terme was Paulus 'n Afrikaner der Afrikaner. Hy was 'n Professor in Afrikaanse kultuur. Hy was 'n taalvegter by uitstek. Hy was 'n Professor in die geskiedenis van sy voorouers. Hy het dit so erg nagestreef dat hy die nuwe Christelike kultuur wat sy eie kultuur bedreig het, vervolg en probeer uitwis het. Na sy bekering skryf hy dat  hy sy verlede as waardeloos bestempel om die uitnemendheid van Christus te bekom sodat onder die Jode en nie-Jode niks anders as Christus die gekruisigde verkondig sal word nie. Paulus het niks in die pad van die evangelie laat staan nie. Nie eers sy kultuur en beelde nie.

Dit sal ons as blanke Afrikaanse Christene goed doen om ons emosioneel los te maak van ons herkoms, beelde en kultuur sodat dit nie in die pad van die evangelie en Christus staan nie. Ons moet ophou veg vir ons beelde, voorouers en geslagte tot so mate dat ons ander sal doodmaak (letterlik en figuurlik) daarvoor. Ons moet ons losmaak van ons verlede en Christus en Sy koninkryk as erfenis bekom sodat ons vir nie-Afrikaners die evangelie kan bring. Ons moet vir nie-Afrikaners, nie-Afrikaners word om sommiges vir Christus te wen. Ons moet ons emosioneel losmaak van die verlede sodat ons nie kwaad word as mense ons beelde afbreek nie. Ons moet die evangelie en die koninkryk as ons erfenis opneem en dan aan mense wat ons aardse kultuur haat, die evangelie in liefde bring sodat sommiges van hulle saam met ons kan deel raak van die enigste ware erfenis in Christus. As ons nog emosioneel vasgebind is aan ons beelde, simbole en erfenis gaan ons kwaad raak vir mense wat daaraan vat. Ons gaan met hulle baklei en sodoende anti-evangelie optree in die sin dat ons die brûe vir die verspreiding van die evangelie afbrand. Ons moet brûe bou vir die evangelie en dit beteken dat ons luister en hoor as ander kulture praat. Dit beteken dat ons nie met hulle veg oor beelde nie, maar eerder die "beeld" van God genaamd Christus aan hulle sal voorhou. Al praat hulle verkeerd en breek ons beelde vir die verkeerde redes af, moet ons terwille van die evangelie dit tot 'n mate verdra. Ons moet nie dat ons aardse erfenis so groot word dat dit ons van mense vervreemd deur vir hulle kwaad te word en met hulle te veg nie. Ons moet altyd Christus en Sy doel voor oë hou. Christus het nie gekom om 'n aardse kultuur te verhef bo die evangelie nie, maar sodat ons, ons moet losmaak van die aardse beelde ter wille van die evangelie. Sodat ons daagliks sal sterwe aan ons eie beelde om Hom alleen as die ware "beeld" van God te bekom. Deur dit te doen verhef ons die "beeld" van God, naamlik Christus, as die enigste lig en hoop van die wêreld.

Beteken dit nou ek as blanke Afrikaner mag niks meer geskiedenis hê nie. Ek mag nie meer voorouers hê waarop ek trots is nie? Ek mag nie meer braai en rugby kyk nie? Ek mag nie meer 'n erfenis hê nie? Ek mag nie meer 'n taal hê nie? Ek moet nou maar 'n naamlose en identiteitlose persoon wees wat heeltemal verwyder is van my herkoms. Ek mag nie meer 'n aardse kultuur hê nie? Ek mag geen waardering en lof hê vir my eie kultuur en mense nie? Nee, dis nie wat dit beteken nie. Die Woord van God het in die konteks van 'n kultuur en die karakter van mense gekom sodat die Woord van God deur alle eeue, onder alle kulture en onder alle tye relevant sal wees. Dit impliseer dat ons kultuur welkom is in die konteks van die kerk en die Woord. Maar dit beteken wel dat ons nie moet toelaat dat ons kultuur verhef word tot so mate dat ons daarvoor meer sal veg as vir die evangelie nie. Dat ons nie meer van ons kultuur maak as van die kultuur van die nuwe verbond nie. Dat ons nie brûe sal afbrand ten koste van die evangelie en ten gunste van ons beelde nie. Ons kultuur mag ook nie ander mense as minderwaardig behandel nie. Ons kultuur mag ook nie die liggaam van Christus verdeel nie. Ons mag nie die liggaam van Christus opdeel in groep nie. Maw. ons kan nie sê wit Afrikaners moet eenkant aanbid en ander groepe mense moet op 'n ander plek aanbid nie. Die liggaam van Christus is 'n multikulturele opset waar alle kulture en mense gelyk is. Die kerk bestaan uit uitverkorenes uit alle volke, nasies en tale wat saam Christus as Here aanbid en mekaar liefhet. Waar mense in respek en liefde saamleef met mekaar. Christus het alle gelowiges gedoop in een liggaam deur die Gees en verenig in die kruis. Die skeidsmure tussen gelowiges uit alle groepe is afgebreek en een nuwe mensheid is geskep in Christus. Christus het net een bruid. Deur so te veg vir ons regte dat ons, ons vervreem van ander mense, verhef ons, ons kultuur amper tot die status van goddelikheid en word dit 'n afgod. Deur te veg in die wêreld met agressie vir ons beelde verhoed ons die evangelie om vry te beweeg na alle groepe mense en ons brand brûe af vir die evangelie na alle tipes mense. Ons isoleer onsself en skep vyandskap en dit raak dan moeilik as Christen om met ander nie-Christene die evangelie te deel. Na my mening moet ons as Christene uit daai geveg tree oor beelde en ons eerder beywer vir die "beeld" van Christus. Ons moet uit die publieke debat tree waar ons ander mense beveg en sodoende vyandskap skep omdat hulle sekere beelde wil afbreek. Ons publieke debat moet oor Christus die gekruisigde gaan. Jesus het gesê as Hy opgelig word soos die goue slang in die woestyn sal Hy alle tipe mense na Hom trek. Noudat Jesus hemel toe is het Hy die taak aan ons as Christene oorgelaat om Jesus soos 'n beeld en baken op te lig vir mense van alle kulture sodat hulle na Hom kan kom. As ons, ons eie beelde ophef en daarvoor veg, gaan ons sukkel om Jesus as 'n "beeld" op te lig vir die wêreld.